Azərbaycanlı dizayner Türkiyədə aldığı mükafatı xanımına ad günü hədiyyəsi etdi

Azərbaycanlı tanınmış dizayner Rafael Abbasov Türkiyədə "Mood" mükafatlandırma gecəsinə dəvət alıb.
Axşam.az xəbər verir ki, tədbirdə Türkiyənin bir çox məşhur siması da yer alıb. Dizayner qardaş ölkədə "İlin ən zövqlü dizayneri" mükafatına layiq görülüb. Rafael səhnədə ad günü olan həyat yoldaşı Şenay Abbasovanı təbrik edib və mükafatını ona bağışladığını bildirib.
Dizayner məşhur gecə ilə bağlı təəssüratlarını bölüşüb. O bildirib ki, yüzlərlə məşhur içərisindən seçilməsi qürurvericidir:
"Tədbirin təşkilatçıları sosial şəbəkədə bizim səhifələri izləyirdi. İşlərimizi bəyəndiklərini hər zaman deyirdilər. Mükafatlandırma gecəsinə dəvət gəldi, biz də iştirak üçün xüsusi hazırlaşdıq.
Türkiyədə də müştərilərimiz kifayət qədərdir. Hətta müştərilərimizin bir çoxu Türkiyədəki evlərinin dizaynını bizə həvalə edirlər. Qardaş ölkə ilə sıx əməkdaşlığımız var. Yayda "Altın Boğaz" mükafatını da almışdıq.
Möhtəşəm gecə idi. Tədbirdə Türkiyədə öz sözünü demiş insanlar iştirak edirdi. 2 mindən artıq qonaq var idi. Mükafat insanların və münsiflərin səsverməsi ilə sahiblərinə təqdim olunub. Azərbaycanı layiqincə təmsil etmək qürurvericidir".