Hakim Elbəy Allahverdiyevin sədrliyi ilə keçən prosesdə müttəhimlər kürsüsünə Mövlam Şıxəliyevlə yanaşı MTN-in şöbə rəisi vəzifəsində işləmiş Vüsal Ələkbərov, İbtidai istintaq idarəsinin rəis müavini olmuş Yasin Məmmədov və şöbə rəisinin müavini postunu tutmuş Sahib Ələkbərov çıxarılıblar. 

İttihama görə, Mövlam Şixəliyev və digər 3 nəfər mütəşəkkil cinayətkar dəstə halında 14 milyon 292 min manat, 5 milyon 77 min manat məbləğində isə özgə əmlakını hədə-qorxu ilə ələ keçirib.

Mövlam Şıxəliyevə qarşı Cinayət Məcəlləsinin 182.3.1, 182.3.2 (külli miqdarda əmlak əldə etmək məqsədi ilə mütəşəkkil dəstə tərəfindən hədə qorxu ilə tələb etmə), 294.3 (sübutları saxtalaşdırma), 311.3.1 (qabaqcadan əlbir olan bir qrup şəxs tərəfindən rüşvət alma) və digər maddələri ilə ittiham irəli sürülüb. Vüsal Ələkbərov, Yasin Məmmədov və Sahib Ələkbərov həmin məcəllənin 311.3.1, 341.2.1, 341.2.3-cü (vəzifə səlahiyyətlərindən sui-istifadə və ya vəzifə səlahiyyətlərini aşma) və digər maddələri ilə təqsirləndirilən şəxs qismində cəlb edilsələr də, ibtidai istintaq dövründə həbs olunmayıblar.

Məhkəmə də ibtidai istintaq dövründə barələrində verilən qərarı dəyişməyib.

Odur ki, təqsirləndirilənlər məhkəmə binası qarşısında zərərçəkənlərə, mətbuat nümayəndələrinə təzyiq göstərməkdən çəkinmirlər.

Sonuncu prosesdən öncə zərərçəkənlərdən Hüseyn Səfərov mətbuat nümayəndələrinə deyib ki, təqsirləndirilən şəxslərdən Yasin Məmmədov onlara məhkəmə binası önündə təzyiq edir: “Yasin Məmmədov məhkəmədə Mövlam Şıxəliyevi müdafiə edən çıxışlar edir. Məhkəmə binası qarşısında isə bizə təsirlər edir. “Bunu demə, onu demə” deyir.

Bu gün Vüsal Ələkbərovun azadlıqda olması böyük təhlükədir

Zərərçəkən deyib ki, Mövlam Şıxəliyev vəzifədə olarkən, 10-12 dəfə onun kabinetində olub: “Kabinetində olduğum müddətdə həmişə pul söhbəti gedib. Mənə deyib ki, bu qədər pul verməlisən. Əvvəl 3 milyon dollardan başladılar. Sonra 2 milyon dollara düşdülər. 2 milyon dolları da aldılar. Aldılar ki, banka pul qoymusan, puldan əl çəkməlisən. Guya həmin pullar “Texnikabank”da balansda olmayıb. Sonra da məni çağırıb deyirdilər ki, get balansda olmayan pulları ödə. Gəlib deyirdilər ki, get adamları tap, gəlsinlər. Pulları bankdan alıb 50-50-yə bölək. İndi də bizə təzyiq edirlər. Deyirlər ki, bizə heç nə edə bilməyəcəksiz. Mənə deyirlər ki, o vaxt verdiyin pul rüşvət sayılır, rüşvət də geri qayıtmır. Mən də deyirəm ki, həmin sözü gəlin məhkəmədə deyin. Boynunuza alırsınız ki, məndə o pulu almısız. Nə adla almısız məsələnin mahiyyətini dəyişmir. Çöldə bunu etiraf edirlər. Gətirib pulumuzu versinlər. Bu gün Vüsal Ələkbərovun azadlıqda olması böyük təhlükədir. Mən bəzi faktları açıqlayacağam. Onun çöldə qalması böyük təhlükədir”.

Məhkəmə iclasında isə Hüseyn Səfərovla Əfsəl Həsənəliyevin vəkili Osman Kazımov prosesin audio-video çəkilişlə aparılmasına dair vəsatətlə çıxış edib. Azərbaycan Respublikası Prezidentinin 2020-ci il 1 iyun tarixli Fərmanının 6.1.16. bəndinə uyğun olaraq məhkəmə iclasının audio və video texniki vasitələrdən istifadə etməklə qeydə alınmasına dair vəsatətlə çıxış edib. Digər zərərçəkənlər və onların vəkilləri də vəsatəti dəstəkləyib. Hakim Elbəy Allahverdiyev deyib ki, məhkəmənin audio-video çəkilişinin aparılması üçün texniki imkanları yoxdur. Bu səbəbdən vəsatət təmin edilməyib.

Milli təhlükəsizlik orqanlarında aparılan istintaqa 2 mötəbər nəzarət qurumu bilavasitə nəzarəti həyata kecirib və bu gün də belədir. Bu qurumlardan biri Baş Prokurorluqdur. Məhkəmədə bu məqama istinad edən zərərçəkənlər deyirlər ki, baş prokuroroun 1-ci müavini Rüstəm Usubov onların qanunsuz həbs qərarlarına vəzifəli şəxs kimi imza atıb. 

Bundan başqa, MTN-də istintaqa nəzarət edən idarə də olub. Həmin idarəyə də general rütbəli vəzifəli şəxs rəhbərlik edir. Baş verən cinayətlərə istinad edən zərərçəkənlər həmin idarə rəhbərliyinin də cinayətlərə şərik olduqlarını vurğulayıblar. Onlar deyir ki, bu qurum işini qanundan kənar qurmasaydı, MTN-də uzun illər boyu mütəşəkkil cinayətkar quldur əmələ gəlib yuva qura bilməzdi. Vətəndaşları saxta ittihamla qorxudub, prokurorun razılıgı ilə həbs edib, qanunsuz olaraq zindana salıb aylarla orada saxlamaz, pullarını, mallarını və mülklərini əllərindən ala bilməzdilər. Üstəlik, iş üzrə zərərçəkənlər MTN-də soyğunçuluğa məruz qalandan sonra həmin prokurorun imzası və razılıgı ilə azadlıga buraxıblar.

 Zərərçəkənlər iddia edir ki, hər iki nəzarətedici qurumuun rəhbərliyi onlara qarşı baş verən cinayətlərdə birbaşa maraqlı olublar. Buna görə də nəzarətedici qurumların istintaqdan kənar qalan rəhbər şəxslərinin məhkəmənin diqqətinə çatdırmaqla tədbir görülməsini qətiyyətli istəyiblər. Deyiblər ki, təqsirləndirilən şəxslər ifadələrində ayrı-ayrı epizodlar üzrə Rüstəm Usubovun adını çəkir, bilavasitə məsuliyyəti onunla bölürlər.

Prosesdə hakim təqsirləndirilən Vüsal Ələkbərova söz verib. O, sərbəst ifadə verməkdən imtina edib. Bundan sonra hakim Sahib Ələkbərova sərbəst ifadə verməyi təklif edib.

Sahib Ələkbərov bu cinayətləri törətməkdə təqsirləndirilir

Haşiyə:

İttihama görə Sahib Ələkbərov mütəşəkkil cinayətkar quldur dəstənin tərkibində olmaqla 4 epizod üzrə zərərçəkənlərə ağır zərər vurmaqla müşayiət olunan cinayətləri törətməkdə təqsirləndirilir.

İttihamda qeyd olunur ki, Sahib Ələkbərov vəzifəli şəxs kimi mütəşəkkil dəstə tərkibində xidməti vəzifəsinin (səlahiyyətlərinin) icrası ilə əlaqədar edəcəyi qanunsuz hərəkətin müqabilində özü və üçüncü şəxslər, yəni mütəşəkkil dəstənin digər üzvləri üçün birbaşa yolla, şəxsən külli miqdarda rüşvəti təkrarən hədə-qorxu tətbiq etməklə istəyərək alıb. Vəzifəli şəxs kimi müntəzəm olaraq mütəşəkkil dəstə tərkibində tamahkarlıq məqsədilə və şəxsi marağa görə hakimiyyətdən, öz qulluq mövqeyindən sui-istifadə edib, hakimiyyət həddini və qulluq səlahiyyətlərini aşmaqla Milli Təhlükəsizlik Nazirliyinin kəşfiyyat, əks-kəşfiyyat fəaliyyəti, dövlət sirrinin mühafizəsi, cinayətlərin aşkarlanması, qabaqlanması, qarşısının alınması və açılması sahəsində Azərbaycan Respublikasının qanunvericiliyi ilə müəyyən edilmiş səlahiyyətlərini həyata keçirməsi ilə bağlı hüquq və qanuni mənafelərinə zərər vurub. 

Zərərçəkən şəxslərə münasibətdə onların hüquqlarına və qanuni mənafelərinə, ailə üzvlərinin müflisləşməsi, psixi təsirlərə, külli miqdarda maddi və digər mərhumiyyətlərə məruz qalmasından ibarət ağır nəticələrə səbəb olan təkrarən əhəmiyyətli zərər vurub.

Sərbəst ifadəsində Sahib Ələkbərov bildirib ki, tərəfindən istintaq olunan cinayət işləri üzrə Mövlam Şıxəliyevdən şifahi göstərişlər alıb: “Cinayət işlərinin başlanması, xitam edilməsi, qəti imkan tədbirinin həbslə əlaqəli olub-olmaması, istintaqa cəlb olunan şəxsin barəsindəki qəti-imkan tədbirinin dəyişdirilməsi, azad edilməsi, tövsif məsələləri Mövlam Şıxəliyevin göstərişləri ilə həyata keçirilib”.

Mövlam Şıxəliyev əlaltısına tapşırığın Rüstəm Usubovdan gəldiyini deyib

Sahib Ələkbərov sərbəst ifadəsində konkret faktlara da istinad edib. O deyib ki, ailəsi ilə birgə Bilgəh qəsəbəsində istirahətdə olarkən, axşam 8-9 radələrində Mövlam Şıxəliyev onunla əlaqə saxlayıb və tapşırıb ki, Sahib Ələkbərov özünün qərarı əsasında həbsə aldığı 4 şəxsi təcili azadlığa buraxmalıdır. Sahib Ələkbərovun sözlərinə görə, Mövlam Şıxəliyev onunla telefon danışığı zamanı belə bir tapşırığın baş prokurorun 1-ci müavini Rüstəm Usubov tərəfindən verildiyini deyib. O da tapşırığı alandan sonra təcili işə gedib və qərarı dəyişərək həmin 4 təqsirləndirilən şəxsi azad edib.

Sahib Ələkbərov bundan sonra verəcəyi ifadə ilə əlaqədar prosesin qapalı keçirilməsini istəyib. O deyib ki, bu gün də vəzifədə olan şəxslərin biznes maraqlarına toxuna biləcək ifadə vermək istəyir.

Sahib Ələkbərov “açdı sandığı, tökdü pambığı” – Mövlam Şəxəliyevi ələ verdi

Sahib Ələkbərov ifadəsini bitirər-bitirməz dəmir barmaqlıq arxasında olan sabiq rəisi Mövlam Şıxəliyevin vəziyyəti gərginləşib. Sabiq rəis yarı oturmuş vəziyyət almaqla əlindəki suyu içməyə başlayıb. Əlaltısının ifadəsindən sonra Mövlam Şıxəliyevin durumundakı qeyri-adi dəyişiklik zalda olan hər kəsin diqqətini çəkib. Hakim Elbəy Allahverdiyev Mövlam Şıxəliyevin dəmir barmaqlıq arxasından çıxarılaraq yardım göstərilməsi üçün qısa müddətli fasilə elan edib. Hakim bildirib ki, fasilədən sonra Mövlam Şıxəliyev Sahib Ələkbərovun ifadəsi ilə bağlı dindiriləcək.

Bu zaman zərərçəkənlərdən Hüseyn Səfərov Mövlam Şıxəliyevə yönəlik “artistlik edir” deyib. Digər zərərçəkənlərdən biri isə deyib ki, əvvəlki prosesin sonunda Mövlam Şıxəliyev əlini ürəyinin üstünə qoyub özünü pis hiss etməsi görüntüsü yaratmağa çalışıb. Lakin ona fikir verilməyib. Bu dəfə də eyni hərəkəti bir başqa formada edir. Bu, sadəcə bir tamaşadır.

Zərərçəkən Zaur Əliyev isə vəsatətlə çıxış edib. O bildirib ki, Mövlam Şıxəliyev xəstə olması görüntüsünü yaradır, simulasiya edir:

- Buna görə də xahiş edirəm ki, həkim dəvət etməklə Mövlam Şıxəliyev müayinə olunsun. Sağlıq durumu haqda həkim arayışı alınsın.

Həkimlər məhkəməyə gəldi: “Cüzi təzyiq oynaması qeyd olunur”