“Qadına şiddətə son” dedilər - Fotolar

İş xanımı Ruhi Əliyevanın təşəbbüsü ilə "Qadına şiddətə son!" mövzusunda layihə ilə bağlı tədbir keçirilib.
Asmedia.az xəbər verir ki, 25 noyabr Qadın Zorakılığına qarşı Beynəlxalq Mübarizə Günü ilə əlaqədar təşkil edilən gecədə tanınmış simalar da qonaq olublar.
Daxili İşlər Nazirliyinin (DİN) İnsan Alverinə qarşı Mübarizə Baş İdarəsinin dəstəyi ilə baş tutan gecədə aparıcılıq Leyla Quliyevaya həvalə edilib.
Daha sonra layihə çərçivəsində hazırlanan çarxlar nümayiş edilib. Tədbirdə çıxış edən millət vəkili Qənirə Paşayeva hər kəsi qadınlara dəstəyə səsləyib:
“Bu cür yanaşmaların artmasına ehtiyac var. Analar ağlayanda övladlar gülə bilmir. Hər şey yarımçıq olur. Ailələrimizi, gələcəyimizi qorumaq üçün zorakılığa son qoymalıyıq. Əgər şiddət varsa, bu ailədaxili problem ola bilməz. Əl uzatmalıyıq, dövlət qurumlarına müraciət etməliyik”.
Millət vəkili Jalə Əliyeva da çıxış edərək qadınların susduqca, daha çox şiddət gördüklərini deyib.
Xalq artisti Nəzakət Teymurova Ramiz Rövşənin “Qara paltarlı qadın” şeirinə yazılan mahnı səsləndirib.
Aktyor Kamran Yunus “Qadına əl qaldırmaq olmaz. Buna son qoymaq lazımdır. Bəzən böyük danışır, kiçik amillərdə ilişib qalırıq” sözlərini söyləyib və şeir səsləndirib.
Tədbir zamanı qadın zorakılığını əks etdirən videoçarxlar nümayiş edilib.
Gecədə eyni zamanda Saleh Bağırov, Hacı Nuran Hüseynov, Kamran Ağabalayev, Murad İsmayıl, Kobra Pərviz və digər tanınmışların iştirakı ilə “Mən sizdən üzr istəyirəm” sözünün yer aldığı çarx təqdim edilib.