"Ramiz Mehdiyevin elmi yazıları 3-cü Reyxin məhşur ideoloji ştampıdır"

Təəccüblənməyin. Bakı Slavyan Universitetində müdafiə olunan dissertasiyadakı tezislərdən biri məhz belə adlanır. "Hansı dissertasiya?", "Kim müdafiə edib?", "Kimin himayəsi altında bunlar baş verib?" suallarına isə gəlin birlikdə cavab axtaraq.

Hər kəsə məlumdur ki, Bakı Slavyan Universiteti pedaqoji profilli ali təhsil müəsisəsidir. Bu universitet  Heydər Əliyev tərəfindən keçmiş M.F.Axundov adına Rus dili və Ədəbiyyatı İnstitutunun bazasında yaradılmışdır. Ali məktəbin ilk fəxri doktoru da məhz Rusiya Federasiyasının Prezidenti V.V.Putin olmuşdur. Bu universitet Rusiya Federasiyasında yaşayan xalqlar ilə yanaşı bütün slavyan ölkələri ilə dostluq, elm və təhsil əlaqələrinin inkişafı məqsədilə müdrik bir uzaqgörənliklə yaradılmışdır.

Lakin səriştəsiz rəhbərliyin apardığı qeyri-düzgün kadr siyasəti elm və təhsil ilə əlaqəsi olmayan "müəllimlərin" şəxsi maraqlarını həyata keçirməsinə münbit şərait yaratmış oldu. Son illər Bakı Slavyan Universiteti ilə bağlı mətbuatda dərc olunanlar burada nələrin baş verdiyinə cəmiyyətdə maraq oyatmışdır. Universitetin fasadına həkk olunmuş qədim üzlüyün dağıdılmasından tutmuş şöbə müdirinin müəllimlərlə əlbir olub tələbələrin pulunu mənimsəməsinə qədərki dövr arasında baş verənləri internet axtarış sisteminə vurub oxusaq bizə saatlar bəs etməz.
Görünən budur ki, burada təlim-tərbiyə işləri də kifayət qədər nəzarətsiz buraxılıb. Yüksək keyfiyyətli təhsil verməli olan universitet daha tələbələri dərsdən ayırıb onlara çalıb-oxumaq və rəqs öyrədəcəkdisə onda Bakı Xoreoqrafiya Məktəbi, İncəsənət və Mədəniyyət Universiteti nəyə lazım idi? Etiraf edək ki, təlim-tərbiyə işləri incəsənətlə məhdudlaşmasa idi, tələbələrinə ədəbsiz təklif edən iki müəllim valideynlərin şikayəti əsasında yox, təlim-tərbiyə işləri üzrə prorektorun təqdimatı əsasında qovulardı.

İndi biz biləndə ki, rektor Nurlana Əliyevanın "yetişdirdiyi" və əzizlədiyi növbəti "müəllimlər" hansı əməlləri törədib, onda baş verənlərin heç də səriştəsizlik və təsadüfdən baş vermədiyini ehtimal edə bilərik. Ümummilli liderin abidəsinə öyrədilmiş ifadələr yazan tələbələrə dərs demiş həmin müəllimlərdən yaxşı bir şey gözləmək də gülünc olardı. Yeni rəhbərlik isə bütün bu olanlara məlum səbəblərə görə göz yumdu. Məhz buna görə Bakı Slavyan Universitetinin Əlavə və qiyabi təhsil şöbəsinin müdiri Dürdanə Əliyeva, onun yaxın rəfiqələri Sevil Hümmətova və Vəfa Allahverdiyeva barəsində yazılanlar elm və təhsil cameəsinin adına ləkə gətirir. Çünki söhbət bir müəllimdən yox, fırıdaqçı "müəllim" dəstəsindən gedir. Məsələyə Baş Prokurorluqdan savayı Daxili İşlər Nazirliyinin də münasibət göstərməsini zəruri edən amillərdən biri də həmin müəllimlərdən birinin qardaşı oğlunun Bakı şəhəri üzrə Yol Polisi əməkdaşı olmasındadır. Bakı Slavyan Universitetinin rəhbərliyi isə məsələ ilə bağlı mövqeyini sərgiləməkdən imtina edir və beləliklə yazılanların doğru olduğunu dolayı olaraq təsdiqləyir.

Hadisədən bixəbər olan oxucularımıza belə qısa özət verək ki, Əlavə və qiyabi təhsil şöbəsinin müdiri işləmiş Dürdanə Əliyeva tələbələrin təhsil haqlarını mənimsəmişdir və bu işdə ona yaxın rəfiqələri, həmin şöbədə dərs deyən Sevil Hümmətova və Vəfa Allahverdiyevanın da dəstək göstərdiyi qeyd olunub. Hətta Vəfa Allahverdiyevanın Bakı şəhəri üzrə Yol Polisi İdarəsində çalışan qardaşı Anar Allahveriyevin də baş verənlərlə bağlılığı qeyd olunub.

Daha sonra Vəfa Allahverdiyevanın doktorantura təhsili aldığı müddətdə ödənişli əsaslarla oxumasına baxmayaraq ödənişləri gecikdirməsi, sonuncu təhsil haqqını ödəməkdən isə tamamilə imtina etməsi və təhsil haqqını Dürdanə Əliyevaya ödəməsi haqqında dərc olunan xəbər oxucunu istər-istəməz kiçik bir araşdırmaya sövq edir. Əcəba, bunlar kimdir? Doğrudanmı onların arxasında duran güclər (məqalədə bu güclərin bəzilərinin adı çəkilir) dövlətin pulunu büdcəyə ödəməməsi bir kənara, dövlətin struktur bölmələrini də iflic etməyə qadirdir? Yoxsa, məqalədə yazıldığı kimi, ardıcıl aparılan maliyyə və audit yoxlamaları zamanı bu hal mütləq sorğulanardı. Universitetin Baş mühasibi Dürdanə Əliyevaya və onun əlaltılarının maraqlarını müdafiə etməsindən universitet rəhbərinin xəbəri olmaya bilməz. Görünür əldə olunan gəlirdən onun payı vaxtlı-vaxtında yetişirmiş.
Əcəba, Vəfa Allahverdiyeva bəs kimdir? Onun adını internet axtarış sisteminə vuranda www.nizamimuseum.az saytında alimlik dərəcəsi aldığını görmüş olarıq. Sizcə o bu dərəcəni harada ala bilərdi? Bəli. Yanılmadınız. Bakı Slavyan Universitetində. Müdafiə 2017-ci ildə baş tutmuşdur və həmin vaxt rektor Nurlana Əliyeva idi.

Maraq güc gəlir və biz axtarışımıza davam edirik. Dissertasiya ilə tanıç olmaq üçün mövzunun adını bu dəfə M.F.Axundov adına Milli Kitabxananın axtarış bölməsinə qeyd edirik. Bundan sonrası isə sadəcə inanılmazdır. Oxucuların marağını nəzərə alıb dissertasiyadan bəzi tezisləri yazırıq. Müstəqil Azərbaycanın ilk siyasi xadimləri olmuş bu cür şəxsiyyətlər ilə milyonlarla günahsız insanın ölümünə bais olmuş nasist lider Adolf Hitlerin adını birlikdə çəkmək, paralellər aparmaq, müxalifət qəzetlərindəki "Azərbaycan pensiyaçıları yol süpürür, xaricilər isə dünya turuna çıxır" kimi başlıqlara dissertasiyada yer vermək ikrah hissi doğurur.

Ümummilli lider Heydər Əliyev haqqında:
"70 yaşlı H.Əliyev 30 gün ərzində parlamentin üzvləri ilə danışıq tərzini hər gün dəyişirdi. (Səh. 66)"

"Lakin elə siyasət adamları var ki, onlar həmişə xalq arasında olduğundan qabaqcadan nə haqda danışdıqlarını bilmirlər. (Səh.52)".

"Adi gərginlik” fonunda yeni müstəqillik illərinin gərginliyi şübhə altına qoyula bilər. Yəni gecə-gündüz 24 saat ərzində var gücü ilə çalışmağa vərdiş edən insan daha bundan artıq hansı gərginliyi qəbul edə bilər? (Səh. 56)

"Yəni Prezidentin iş günü xoş işlər görməkdən ibarətdir". (Səh. 77) 

"Müasir dövrdə suveren respublikalarda xalq kütlələri küçələrə çıxaraq öz siyasi iradəsini elan etməyə başlayır". (Səh. 79)"

Azərbaycan Respublikası Prezident Administrasiyasının əvvəlki rəhbəri Ramiz Mehdiyevin siyasi fəaliyyəti daha ətraflı şərh edilir və qeyd olunur ki, R.Mehdiyevin elmi yazıları 3-cü Reyxin məhşur ideoloji ştampıdır (Səh.84) 

"R.Mehdiyev eksplisit şəkildə Avropa qurumlarını “nizamsızlıqda”, “pozğunluqda”, “qarışıqlıq salmaqda” ittiham edir" (Səh.82).

Rusiya Federasiyasının Prezidenti V.V.Putin haqqında:

"Rusiya prezidentləri, istər B.N.Yeltsin, istərsə də V.V.Putin istənilən kobud ifadələrdən istifadə edir" (Səh.136).

Rusiya Liberal Demokrat Partiyasının banisi və lideri V.V.Jirinovski haqqında:
"Джордж, ты — ковбой. Ты остановись, блядь, ты кончай, ты патроны спрячь подальше на склад. И забудь про своего папу. У нас был один мудак, отомстил за брата, блядь — и рухнула великая Российская империя. И другой чудак, за своего дедушку отомстил — и рухнул Советский Союз. И ты повторишь ту же ошибку. Ты папу забудь, папа твой отработал своё, блядь. Ты подумай о будущем Америки: она гибнет! Твоя молодёжь бежит из твоей страны. Там никто не хочет жить, в Америке, никто! У тебя барахолка, блядь! Доллар, доллар, доллар! Это… грязная зелёная бумажка, блядь! Ни души, блядь, ни музыки нету у тебя, нет писателей у тебя! Весь мир слушает Чайковского, Достоевского, блядь. Фестивали, спорт — только Россия, блядь. И Россия здесь — Ирак! Вот здесь любят президента, а тебя — презирают, блядь, презирают!" (Səh.108) 

Çeçenistan rəhbəri Ramzan Kadırov haqqında

"R.Ə.Kadırovun siyasi imici də, Jirinovski kimi, eyni modeldə reallaşır. Ona görə də Kadırovun da siyasi obrazı kütlələrin şüurunda gülünc aura ilə əhatə olunur. Çeçenistan lideri öz xalqının kütləvi imicindən istifadə edib özünün şəxsi imicini yaratmaq istəyir, lakin tam əksi alınır. Bu siyasi lider gənclərin məsxərə obyektinə çevrilir."
"Amerika” diskursu Azərbaycan dilində ideoloji baxımdan iki yerə bölünür – iqtidar və müxalifət diskursu. İqtidar diskursu konnotasiyaya malik deyil, neytral səciyyə daşıyır. Əksinə, müxalifət yaratdığı “Amerika” diskursu ABŞ-ın Azərbaycan müxalifətinə olan münasibətindən asılı formalaşır. ABŞ müxalifəti dəstəkləyəndə, Amerika olur demokratiyanın, sülhün və əminamanlığın dünyada zamini. Yox, əgər ABŞ iqtidara dəstək olur və müxalifətin hansısa hərəkətlərini pisləyir, deməli, bu ölkə dünyada jandarm rolu oynayır.(Səh.74)"

Müəllifin bilərəkdən çox incə ustalıqla seçdiyi başlıqlara diqqət edin. Bu başlıqlar gələcək nəsil üçün hədəflənib və sözügedən illərdə baş vermiş tarixi hadisələr barədə müəllifin mənfi rəy formalaşdırmaq istədiyi aydındır.

Məsələn, dissertasiyada "стационар" sözü təhlil edilərkən "ABŞ-ın qoşunları 120 ölkədə fəaliyyət göstərir". "Dünyanın 45 ölkəsində ABŞ-ın stasionar bazaları mövcuddur" səpgili mübahisə doğruacaq, elmi faktlara söykənməyən siyasi iddialardan nümunə gətirilmişdir. İnternetdə mövcud olan avtoreferat linklərinə nəzər salsaq (www.korpus.azerbaycandili.az, www.nizamimuseum.az) çapa imzalanma tarixinin naməlum olduğunu görəcəyik. Sual işarəsi ilə işarələnib. Ehtimal ki, dissertasiya müdafiəsi tələm-tələsik baş tutub, heç bir prosedur qaydalara və normalara əməl edilməyib.

Bütün təhsil işçiləri, elm camiəsi də Pedaqoji profilli və dövlət əhəmiyyətli bir ali təhsil ocağında siyasi ideologiya çərçivəsində ikili standart və sətiraltı mənalar ilə zəngin olan belə bir elmi işə yaşıl işıq yandırmaq, dövlətimizi Rusiyanın dövlət və hökumət adamları ilə qarşı-qarşıya qoyacaq skandal tezisləri dissertasiya şəklinə salıb M.F.Axundov adına Azərbaycan Milli Kitabxanasında yerləşdirmək təsadüf deyil və araşdırılması zəruri olan haldır.

Hal-hazırda pandemiya dövründə bütün kitabxanalar onlayn formada fəaliyyət göstərir və nəinki yerli, hətta xarici ölkə vətəndaşları olan oxucuların bütün kitabxanaları internet üzərindən sərbəst şəkildə ziyarət etməsi sərbəst olan belə bir vaxtda, ölkəmizin üçün həssas olan hazırkı məqamda, düşünürük ki, bu mövzduda yazılan dissertasiyaların əlçatan olması elm və təhsildən siyasi alət kimi istifadəyə geniş üfüqlər açır.
Heç kim zəmanət verə bilməz ki, sabah və ya bir neçə ildən sonra bu dissertasiya heç bizim vətəndaşların yox, MDB ölkə vətəndaşlarının, xüsusilə bədxah düşmənlərin əlinə düşsə, onda öz əlimizləəleyhimizə onlara necə samballı bir siyasi dəstəvüz verdiyimizə peşman olacağıq.
Ümumiyyətlə araşdırmaq lazımdır ki, bu dissertasiyanı doğrudanmı bu müəllif özü yazıb? Çünki bu daha çox gələcəyə hesablanmış plana bənzəyir. Bundan əlavə, axı buna kim və necə rəy verib? Rəyi verən siyasi elmlər doktorudurmu? Bakı Slavyan Universiteti pedaqoji yönümlü ali məktəb olduğu halda siyasi mövzuda yazılan bir dissertasiya müdafiəsi nə üçün məhz orada təşkil olunmuşdur? İstənilən halda bu məsələlər diqqətlə araşdırılmalıdır. Əks halda bunun arxasında duranlar bu mövzudan doktorluq dissertasiyasında istinad kimi istifadə edəcəkdir.

İlham Cəfərov